المنتدى » زاوية شباب » كذبة نيسان
المشاركة السابقة : المشاركة التالية

كذبة نيسان


الكاتب : raad

غير متصل حالياً

المجموعةالاعضاء

المشاركات43

تاريخ التسجيلالثلاثاء 13-09-2011

معلومات اخرى
حرر في الإثنين 16-01-2012 05:36 صباحا - الزوار : 1906 - ردود : 0
شلون واحد يكدر يألف كذبة نيسان بالعراق , صارلي كم يوم محتار , منين اجيب كذبة قوية ,,, منين يا ربي , المشكلة احنا شعب ما متعودين على الكذب , لان حرام , واحنا شعب يصدك المسلسلات التركية والمكسيكية , ويعتقد نهاية الافلام الهندية نهاية طبيعية وتنزل دموعنا عليها , والله خطية اميتاب عمت عيني عليه , للموت وماعاف حبيبته, شعب نصدك بكل شي ,


اذا واحد كًال احنا اكثر بلد بالمنطقة استقرارا من الناحية الامنية , نكَله عاشت ايدك , والله متكَول الا الصدك ,

واذا واحد كَال اني بحياتي ما جنت بعثي , راسا نكَله صحيح , والله انت بحياتك ما لبست زيتوني , واذا واحد كَال رايح لإيران بس اكمل دراستي وارجع ندعيله بالنجاح والتوفيق ونحط صورته على الكوسترات والكيات وبراس الشارع ,

و حتى قاسم عطا (حشاكم) , شيكول احنا نصدك ,


احنا مصدكَين بالدستور ومصدكَين بالعملية السياسية وبالمصالحة الوطنية وبالشراكة الوطنية وحتى كالونا انتو طلعتوا مو شعب , انتو مجرد مكونات واطياف واحنة مصدكَين ,

ومصدكَين راح نصير احسن دولة بالعالم , ومصدكَين ان رفع الزبالة من محلة الشيخ عمر يكلف صابر العيساوي 43 مليار دينار شهريا , ومصدكَين انه واحد اسمه كامل الزيدي هو افضل شخصية لرئاسة مجلس محافظة بغداد ,

ومصدكين مام جلال يعمل لمصلحة العراق من كسرة وعطش لبوب الشام ,

ومصدكَين بصالح المطلك صار نائب لرئيس الوزراء من اجل مستقبل العراق ,

ومصدكَين راح يسوي مطارات العراق افضل من مطارات ماليزيا , لانه خبير مطارات وقطارات وانفاق , ومصدكَين كلشي , اي شي تريد تكَوله والله احنا مصدكَين , بس لتحلف والله مصدكَيك , مصدكَين شهادتك ونعرف انت دكتور , ونعرف انت تقي وورع ودمث ابن دمث وتصلي صلاة الفجر بوضوء صلاة المغرب , وانك تتلو القران اناء الليل واطراف النهار وانك زاهد في الدنيا متوجه بقلب سليم الى الاخرة .. احنا مصدكَين ,, مصدكَين بكل شي , لو ما مصدكين ما انتخبناكم , شنو احنا مجانين ننتخب كذابين , حشاكم من الكذب , لا عيني والله مصدكين , والشعب من يكول : كذاب , مو الشعب نفسه , الشعب هو ابو المشاكل ,, منو دمرنا غير الشعب , شعب يصدًك كلشي ,

حتى اذا اجاهم واحد ياباني وكَلهم اني موسوي يكَولوله دخيل جدك ابو الجوادين , اللهم صل على محمد وال محمد , والله عرفناك مولانا , ماشا الله حتى اللاب توب مالك اسود ,

واذا اجاهم واحد بلجيكي ابن بلجيكي وكلهم اني من اهل العمارة ,رأسا يصدكَون , اي نعرفك , بيتكم بالمجر يم الفرن, انت مو رجل زهرة بت عليوي وخالتك بدرية , تفضل استريح ابو مطشر .



القاهرني هو العراقيين يصدكَون كل الناس , بس شلش العراقي , شيحجي يكَولون جذاب ,


اكلهم فلوسكم راحت , يكتبولي اسكت جذاب ,


يابه تره يضحكون عليكم , انجب جذاب ,




اختي ام اركان ترى رجلج متزوج عليج , تضحك ام اركان وتكول ابو اركان ميبدلني بجوليا روبرتس , وهو بشرفي متزوج رضية ام الحسابات ,


يمعود قاسم قشمروك الجواز يطلع بورقتين , ليش دفعت ست اوراق , شلش انت تغار لان جوازك ما طلع ,


يابه بيت ابو حمزة , ابو منتظر نسيبكم مو سيًد , الرجّال كناني اني اعرف اهله واخو عدنا بالشركة , اسكت عمي متشوف نور محمد بوجهة ,


خالة ام جمعة ابنج بالمجاميع الخاصة ويحط لاصقات بسيارات الناس , تروح لا افلش راسك بالهاون , ابني اربع وعشرين ساعة كاعد على الفيس بوك ميطلع لباب الحوش ,


وهكذا يستمر ابناء الشعب العراقي في تكذيبي , كلهم يكذبوني , بس صديقي عبد الرضا المسكين , شحجي يصدكَني ,


وقبل كم يوم خطية سألني : شو ماكو شلش محد يسمع حسك , ظل بالي عليك ؟


كتله يا اخي ابتليت بلوة , هاي مريام فارس المطربة , بعد حفلة نادي الصيد اجتني للبيت ومتقبل تطلع واني خايف اهلها يحسًون وتصير مشكله


صفن عبد الرضا ودار راسه شوية وبعدين جاوبني بسرعة : ليش متفلت بيها لسليمانية وهناك تتزوجها على سنة الله ورسوله ...


شتكَولون اسويها واضرب خديجة بوري لو متسوى .



توقيع (raad)

 

(آخر مواضيعي : raad)

  الحياد السويسري

  أسرار خطيرة يكشفها ضابط المخابرات مزهر الدليمي

  من قتل عمر سليمان؟

  رموز مهمة جداً للمواد البلاستيكيه

  اقوى 10 جيوش في العالم من حيث لعدة والعتاد

 

 

 

 تنبيه : جميع الاراء الواردة تعبر عن رأي أصحابها و لا علاقة لإدارة موقع مانكيش كوم بها

 

جميع المواد المنشورة في موقع مانكيش كوم بكل أقسامه لا تُعبّر بالضرورة عن رأي إدارة الموقع

ويتحمل صاحب الموضوع المسؤولية كاملة عما نشره وجميع ردود الفعل المترتبة عليه